O ciclo "Un país de cinema" que organiza Galiza Nova reanudará mañá as súas proxeccións co pase de "As Encrobas: a ceo aberto", un documental que repasa a loita dos veciños das Encrobas (Cerceda) para evitar a expropiación das súas terras para a mina e central de Meirama. A proxección terá lugar mañá martes a partir das 20:30h no Salón Azul do Liceo. O mércores pasarase "Metal en Loita", sobre as folgas do sector do metal dos anos 90 en Vigo, e o xoves "Negra Sombra", un documental sobre o feísmo urbanístico. Pechará o ciclo unha mesa redonda coa participación de Iria Aboi, Secretaria Xeral de Galiza Nova, e o actual responsable local, Anxo Arcai, xunto aos ex-responsables Alberte Muiño e Henrique del Río. O ciclo documental comezou o pasado día 13 coa proxección de Linguas cruzadas, que aborda a situación do galego en Galicia, o día 14 proxectouse Paradise now, un filme sobre a situación do pobo palestino, e o 15 foi o turno de A casa de Lola de Andrés, sobre a desaparición dunha casa emblemática nun municipio calquera da Costa da Morte para deixar paso a un bloque de apartamentos, unha metáfora sobre a especulación urbanística extrapolable ao Casco Histórico betanceiro. Este ciclo de cinema documental galego supón o peche dos actos do XX Aniversario de Galiza Nova en Betanzos. Programa completo [+]info:
http://betanzosweb.com
