A Plataforma Cidadá Queremos Galego preséntase en Betanzos este venres 5 a partir das 20:30h nun acto público no Salón Azul do Liceo. Participará o ex-responsable da Escola Municipal de Teatro e coñecido dramaturgo Manuel Lourenzo, o presidente da AS-PG, Xoán Costa, e o coordinador da plataforma, Fran Rei. A Plataforma cidadá Queremos Galego! é un amplo grupo formado por máis de 650 entidades, institucións e empresas de todo tipo e máis de 5.000 apoiantes a título persoal nacida no verán de 2009 para conscienciar a sociedade sobre a importancia da lingua e cultura galegas, a partir da gran preocupación suscitada en amplos sectores pola política lingüística e cultural regresiva emprendida polo actual goberno da Xunta, presidido por Alberto Núñez Feijóo.Desde a súa constitución, Queremos Galego! promoveu e organizou algunhas das accións sociais máis numerosas dos últimos anos en favor da que, segundo indica o noso Estatuto de autonomía, é a lingua propia do noso territorio. Especial relevo tivo a manifestación celebrada o pasado 18 de outubro en Santiago de Compostela, a terceira mobilización máis numerosa na actual etapa democrática, ou, máis recentemente, a folga xeral convocada no ensino non universitario contra a proposta de decreto presentada pola Xunta para o uso e regulación das linguas no sistema educativo, amplamente secundada polas comunidades escolares.
Froito do interese dun grupo de persoas e algunhas entidades cívicas de Betanzos e a súa comarca, convidámosvos a participar do acto público que imos celebrar este vindeiro venres 5 de marzo ás 20h no Salón Azul do edificio do Liceo con vistas á constitución formal da plataforma cidadá nas Mariñas.
Neste acto contaremos coa presenza e intervención do actor e director teatral Manuel Lourenzo, un dos portavoces de Queremos Galego no plano público; de Xoán Costa Casas (profesor de secundaria e Presidente da Asociación Socio-Pedagóxica Galega); e de Fran Rei, coordinador da comisión xestora da plataforma cidadá.
[+]info:
http://betanzosweb.com
